وجهة نظر

الكلمة الزين تسد الدين

2018-11-07 09:04:20 |
  • رولا خرسا
  • رولا خرسا

    "الكلمة الزين لتسد الدين".. لسه سامعة المثل دا حالا.. لقيت الست الجميلة اللى بتساعدنى من عمر فى البيت بتقوله.. وتوقفت قدّامه كالعادة.

    "الكلمة الزين" يعنى الكلمة الطيبة، وترجمتها فى قصيدة عبد الرحمن الشرقاوى لما قال: "بعض الكلمات نور وبعض الكلمات قبور"، نحن فى أحيان كثيرة نبخل على من هم حولنا بكلمات طيبة.. نخشى إن قلناها من استغلالهم لنا.. ثقافة غريبة تربينا عليها.

    يتربى الرجل الشرقى على عدم إظهار مشاعره، وتربى الأم ابنها على أن الكلام الحلو للستات مش للرجالة.. مع إن الرجالة أما بيكبروا وبيكتشفوا تأثير الكلام الحلو عامة بيقولوه كتير فى غير موضعه.

    ما علينا، نرجع لثقافة "الكلمة الزين"، وحتى بين الفتيات بعضهن البعض تتربى الواحدة على أن تكون "سوسة" و"أروبة"، يعنى تتفرج على صاحبتها وتاخد بالها من أدق تفاصيلها، بس يصعب عليها تقول لها كلمة مجاملة، ولكن مع الوقت والزمن نتعود أن نقول الكلام الحلو بعد أن تمر بنا الأيام.

    تعلمنا تجارب الحياة أننا نسعد عندما نسمع كلمة طيبة، فبالتالى نبدأ فى إعطائها أو توزيعها على من هم حولنا، والمثل الذى استخدمه اليوم صحيح جدًا.. فـ"الكلمة الزين" أى الطيبة تفعل المستحيل، وتفتح أبوابًا مغلقة كثيرة.

    أى حد بيعمل لك حاجة لو قلت له كلمة كويسة هيبقى سعيد جدًا وهو بيعملها لك.. أى حاجة بتتعمل بحب ومن القلب بتوصل أسرع وبشكل أحلى من مليون واجب.

    لدى صديقة بتعمل صينية بطاطس بالكريمة رائعة.. كل أما أقول لها انتى بتعمليها ازاى ترد: "طبختها بحب".. أحلى صينية بطاطس ممكن تأكلها فى حياتك.. وعندى صديقة تانية كل أما تشوفنى تقول لى "بحبك قوى".. أول ما بسمعها الابتسامة بتنط جوايا.. وابنى أما يكلمنى كل يوم ويقول "وحشتينى يا أمى" بحس قلبى بيرقص.

    أى "كلمة زين" من عزيز بتخلينى فرحانة قوى.. والكلام الزين لو مش من القلب ما بيوصلش.. ممكن يحرجك إنه ذوق بس جواك عايز تقول لقائله مش مصدقك بس عشان كلامك دا مش هأقدر ارد.

    "الكلمة الزين" ترد الروح وتشيع طاقة إيجابية فى المكان.. تخليك كدة عندك دفعة ثقة فى النفس تطلع جواك فجأة وكلنا محتاجين جرعات مش جرعة واحدة بس.

    "الكلمة الزين" بترقق القلوب وبتذيب ثلوج.. "الكلمة الزين" أما بتقولها بتسعدك انت قبل ما تسعد غيرك.. جرب كدة خلص المقالة دى وروح قول أى كلمة حلوة لأى حد من قلبك.. والله انت اللى هتبقى مبسوط قوى.

    اللى يجربها يبعت يقول لى.. ربنا يجعل كل كلامنا زين.

    رولا خرسا
    للأعلى