وجهة نظر

تفاءل

2018-10-24 09:31:12 |
  • رولا خرسا
  • رولا خرسا

    إحنا شعوب تربينا على الخوف من الفرحة.. الخوف من التفاؤل.. يقول لك دايمًا "واتفاءل ليه؟.. عشان أتفاءل واتصدم؟.. خلينى أتوقع البلاء وأما يحصل الحلو افرح".. يا سلام.. إيه المنطق ده؟

    مع إن العبارة الشهيرة التى يعتقد البعض خطأ أنها حديث للرسول عليه وعلى آله أفضل الصلاة والسلام "تفاءلوا بالخير تجدوه" هى الأصح.. وحتى لو لم تكن حديثا لسيدنا محمد عليه أفضل الصلاة والسلام إلا أنه كان أسلوب حياة بالنسبة له، وكان دوما ينهى الناس عن التشاؤم ويطالبهم بحسن الظن بالله.

    ومعنى تفاءل فى معجم اللغة العربية أن تغلب الخير على الشر، وأضيف فأقول أن تتوقع الخير مهما كانت المؤشرات تدل على العكس.

    أنا بقى هحاول أقنعكم تتفاءلوا..

    تفاءل ببساطة لأن البلاء هيحصل سواء تفاءلت أو تشاءمت، يبقى ليه تتعب نفسك وأعصابك قبل ما تحصل أى حاجة؟ ليه تتنرفز وتقعد بقى تقرقض فى ظوافرك وتكركب الدنيا فوق دماغك والى حيحصل حيحصل مهما توترت؟ ليه تتوتر وتتعب أعصابك وتضيع لحظة راحة أو سعادة أو حتى هدوء ممكن تعيشها؟

    أحلى حاجة إن احنا مش عارفين بكرة شايل لنا إيه.. ليه نتخيله وحش؟ لما لا أعيش فى حالة من ترقب الحلو ويمكن المفاجأة تكون أن الحلو يجى فعلا؟

    تفاءل لأن اللحظة التى تمر لا تعود فلا تضيعها بالتشاؤم والقلق.

    تفاءل عشان صحتك لأن التوتر بيجيب السكر والضغط وأمراض كتير تانية

    تفاءل لأن الحياة مش مستاهلة.

    تفاءل عشان تعرف تكمل لأن الحياة مليانة تفاصيل موجعه ومش حنعرف نفلت من الوجع.

    تفاءل لأن فى كل نقمة نعمة قد لا تكتشفها فى وقتها ولكن الأيام تثبتها لك.

    تفاءل لأن المستحيل ممكن أن يتحقق.

    تفاءل لأن الأرض مهما ضاقت ففى السماء متسع لكل الدعوات.

    من الآخر كده تفاءل لأنك لا تعيش على كوكب الأرض وحدك، ولأن الذين يعيشون معك وحولك مش ناقصين طاقتك السلبية.. ما تبقاش أنت والدنيا عليهم.

    لكل متشائم وسع كده وشوية نفس وحياة أبوك.

    رولا خرسا
    للأعلى