وجهة نظر

من جاور السعيد

2018-07-11 09:32:24 |
  • رولا خرسا
  • كل حاجة موجودة فى الأمثال من زمان، كل يوم وكل أما اقرأ مثل اكتشف إن الظاهر كل ما نعتقد أننا أول من يمر به مر على البشر منذ بداية الخليقة.

    مثل "زى من جاور السعيد يسعد ومن جاور الحداد ينكوى بناره" ناس كتير فاهماه إن يعنى لو جارك مُرزق حيوزع عليك من رزقه أو من اللى يجيله، دبح خروف يديك كيلو، عمل فرح يعزمك.. كده، بس أعتقد إن المقصود ليس هكذا بالضبط.

    الموضوع أعمق، وكلما قرأت فى مجال الطاقة أكثر كلما فهمت ان هذا المثل صحيح ولكن من منظور مختلف، يعنى لو أنت حواليك أشخاص متفائلين مبتسمين حيدوك طاقة إيجابية، وحيخلوك محب للحياة وعندك حل لمشاكل كتير، ولو حواليك أشخاص شايفين الدنيا من ورا غيمة سودا حيشدوك تقعد جنبهم جوا الغيمة ويقلبوا دنيتك أسود مخطط فى أسود منقط، ولو أنت اصلا طبيعتك من النوع المتفائل بالفطرة حيخلوك تشوف الدنيا رمادى او رمادى على كحلى.

    باختصار كده التفاؤل بيشد طاقة إيجابية بتخليك تشوف إن الخير جاى جاى، وأما تشوف الخير جاى بيبقى عندك يقين إنه حيحصل حيحصل وعلى رأى باولو كويللو الكاتب الشهير فإن العالم كله حيتآمر لتحقيق رغبتك، أما لو قعدت تشيل وتحط وتقول "المصايب بتجرى ورايا" أو "أنا حظى وحش" أو "أنا عارف إن الدنيا مقفلة فى وشى" كل ده تأكد حيحصل لك فعلا، حظك حيبقى وحش، والمصايب حتجرى وراك وبالكوم، وحتلاقى نفسك مش ملاحق على كم الكوارث اللى حتجرى وراك.

    كلامى مش نظرى ده حقيقة صدقونى، يعنى أما تقعد مع حد يفضّل طول النهار يكسر فى مقاديفك ويحسسك إنك حالم رومانسى غير واقعى وإن الواقع مختلف حتفضل مكانك وتحبط، وإحباط ورا إحباط حتتكوى بالنار، وأما تقعد مع حد يحسسك إن فيه أمل وإن مفيش مستحيل وإن كل حاجة ممكن تتحقق وإن أكثر أحلامك جنونا ممكن تتحقق حيديك قوة وحتلاقى القدر والدنيا كلها معاك.

    ده مش كلام نظرى، جربوه ابعدوا عن الناس اللى عندهم لكل حاجة مشكلة بدلا من الحلول، وخليكم مع اللى بيقولوا لكم الدنيا حتبقى فل وساعتها حتبقى ميتين فل وعشرة، اسمعوا كلامى وجربوه، وأما الحلو يجى لكم أبقوا افتكرونى بدعوتين حلوين، تفاءلوا، تفاءلوا بكل ما تشاؤون يكن، وجاوروا السعداء وفوتوا للحدادين بلاد، وأدهن حياتك ألوان كتير قوى، بلاش الغوامق.

    رولا خرسا
    للأعلى