وجهة نظر

حبوا بعض

2018-07-04 08:45:31 |
  • رولا خرسا
  • فيه مثل بيقول "عجيب أمرنا نخجل من الحب ولا نخجل من الكره".. توقفت أمام هذا المثل كثيرًا.. إحنا فعلا شعوب بتخاف من الحب وبتجاهر بالكره.. حتى كلمة "حب" واحنا بنستخدمها بنقولها بحرج شديد وكأنها عيبة.

    يعنى الواحد يروح يكلم أهله وأصحابه عن البنت اللى بيحبها يقول كلام من نوعية أخلاقها كويسة وبنت حلال وفيه تفاهم.. ما تشيل كل اللى فات يا عّم وتقول "بحبها" وخلاص.. بحبها لوحدها تسكّت أجدعها حجة أو منطق، وفيه جملة كده عجيبة غريبة بتتقال لما تسأل حد عن حاجة، إذا كانت حلوة يرد: "مش وحشة".. خلاص أنت قفلتنى بالجملة دى.. معدتش عايزة الحاجة، أو "مش بطّالة".

    وتبقى عاجباه وحتطلع عينه عليها بس يستخسر كلمة "حلوة".. حتى أولادنا مش بنقول لهم كلام حب.. أصل كلمة "بحبك" للولد من مامته حتخليه كدة "مش شديد".. مش عارفه من فين المنطق دا!!! مع إن الحب هو اللى بيقوى.. الحب سند وعزوة.

    العجيب بقى هو إننا بنستخسر نقول كلمة حلوة لبعض، يعنى نعتبر لو حد قال للتانى "شكلك حلو" أو "لابس شيك" أو أى صفة حلوة تحسه كدة زعلان وهو بيقولها كأنه بيدفع فلوس من جيبه.. والدنيا أصلا غالية يبقى مش عايز يدفع طبعا أى مليم زيادة.. الكره بيتقل القلب واللسان.. ليه لما بنسافر بره بننبهر لما بنشوف اتنين كبار فى السن ماسكين إيدين بعض؟ وعندنا يقول الراجل أو الست للتانى: "اختشى على سنك"؟.. ليه بتتكسف نعبّر عن مشاعرنا؟ لو صغيرين نبقى صغيرين على الحب!!.. لو متجوزين يبقى حب إيه إحنا متجوزين!! ولو كبار يبقي الحب مش للكبار!! ومين قال أصلا إن الحب له سن؟ القلب بيفضل عايش لغاية ما الروح تطلع.

    جربوا كده تمسكوا إيدين زوجاتكم زى أيّام الخطوبة.. معلش "اعصروا على نفسكم ليمونة" الحياة مش سهلة.. أو احضنوا أولادكم كتير وقولوا لهم إنكم بتحبوهم.. قولوا لإخوانكم وأصحابكم كلام حلو من قلبكم.. أنا شخصيا مش بزهق أقول لأولادى وكل اللى بحبهم كل شوية أنا بحبكم.. جربوا، هتحسوا كده بحالة سعادة رائعة.. الحب بيسعدنا قبل ما يسعد غيرنا.. وإحنا أصلا بننكش فى الدنيا دى على السعادة بـ"منكاش" على رأى الجميلة نانسى عجرم.

    رولا خرسا
    للأعلى