وجهة نظر

الصبر جميل

2018-05-30 09:51:21 |
  • رولا خرسا
  • رولا خرسا

    أنا من الناس المقتنعة بأن كل اختباراتى فى الحياة فيها درس أساسى هو الصبر.. وإلى حد ما، فهمت الدرس دا، لأنى عارفة نفسى ومقتنعة بأنى شخص غير صبور.

    ولأن ربنا بيحبنا جدًّا كلنا كبشر هو خالقنا فهو على الأرض بيربينا.. وأنا ربنا دايمًا بيربينى، ويقول لى: عايزة الحاجة دى؟ اصبرى.. اتعلمى تصبرى.. وأنا والله يا رب بحاول.. وبطلب منه سبحانه العون دايمًا.

    والصبر مرتبط برمضان بشكل كبير.. نصبر على الجوع والعطش، صحيح الصيام ساعات فقط، إلا أن الحرمان بيخلينا نقعد بعد الإفطار ناكل كأنه آخر يوم أكل قبل ما تضرب المجاعة البلاد.. وشوية جد بقى أقول إن تمرين الصبر على الجوع هو تمرين عملى كده، أو اعتبره "كورس سنوى" يدربك على بقية السنة بيعودك على اختبارات الحياة.

    ولو فكرنا حنلاقى إن الحياة عبارة عن امتحانات متكررة.. الأم وهى حامل بتصبر لغاية ما تضم ابنها بين أيديها.. صبر المريض على الألم ليس بعده صبر.. صبر الفلاح لغاية ما الأرض تطرح.. صبر الشخص الجيد على أى إغراءات ممكن تحيده عن طريقه.. كل حاجة فى الحياة صبر.

    ولو وصفنا الصبر حنلاقيه انتظار نتيجة أمل أو حلم ممزوج بإيمان أو صبر على ظروف صعبة يكون أقصى الأمانى أن تنتهى هذه الظروف بأى شكل.. والصبر ربنا وصفه بأنه جميل، لأنه سبحانه قالها لنا مرارًا إن آخرة الصبر دوما فرج، وقدم الصبر على الصلاة لأنه أصعب.. هو مُر فى أوله وفِى منتصفه، وجميل فى آخره جمالا ينسيك مرارة ما فات..

    ممكن تصبر على زوجة نكدية أو زوج كِشرى.. ممكن صبر على شغلانة مش عاجباك ومضطر تكمل فيها عشان فلوس العيال وأمهم.. فيه صبر على فقد عزيز، ودا صبر صعب لأنك عارف أن اللقاء موعده فى عالم آخر.. صبر الاشتياق لحبيب غائب أو ابن مسافر.. وفيه صبر المحبين يعنى أنك تكون بتحب واحدة وبتتقى ربنا فيها وصابر حتى يجمعكما الله فى الحلال.. أو الصبر على من تحب يعنى حد مطلّع عينك وصابر عليه عشان يا بتحبه يا مضطر لأى أسباب أخرى..

    الصبر أنواع، صبر على ما تحب، وصبر على ما تكره.. والصبر على ما تحب أشكال من بينها الصبر على الطاعات زى الصلاة، وأنك تحافظ عليها.. والصبر على ما تكره هو الصبر على أى نوع من الابتلاءات بقناعة أن الابتلاء مؤقت.. الصبر صعب مفيش كلام، بس أما فى الآخر ربنا بيكرمك ويديك لازم تقول عنه جميل.. صبرًا جميلاً كصبرنا فى رمضان، والله دوما هو المستعان.

    رولا خرسا
    للأعلى