وجهة نظر

كن كريما.. زى رمضان

2018-05-22 20:36:17 |
  • رولا خرسا
  • تعبير "رمضان كريم" تعبير مصرى صرف، لم أسمعه فى أى بلد عربى آخر مع أنى تصادف أن كنت فى رمضان على مدار سنين حياتى فى أكثر من بلد عربى هم يقولون عادة "رمضان مبارك" إنما "كريم" دى مصرية مئة بالمئة.

    ولأن المصريين موجودين فى كل مكان فلقد بدأ المصطلح ينتشر فى بعض البلاد العربية لدرجة أن بعض الناس سألت أهل العلم ووصلوا لفتوى أنه لا يستحب أن نقول "رمضان كريم" على اعتبار أن الكريم هو الله فهو من يعطى لا الشهر، وببساطة ودون فذلكة من جانبى أعتقد أن المقصود بتعبير كريم معنى مجازى وهو أن الناس تصبح آكثر كرما فى رمضان، صدقات أكثر، إطعام أكثر، موائد أكثر، حتى صلة رحم أكثر، ونفسى ناخد صفة الكرم ونطبقها على حياتنا طول السنة مش بس فى رمضان، يعنى نحسن أكثر، نقول لبعض كلام حلو أكثر، نساعد بعض أكثر، أحلى صفة فى الدنيا الكرم مش هازهق من تكرار هذه العبارة، الكريم كريم فى كل حاجة، فى مشاعره فى فلوسه، فى اهتمامه، فى مساعدته، فى ابتسامته، فى الكلمة الحلوة.

    رمضان كريم فى كل ده، رمضان بيخلينا مع بعض أفضل، بيخلينا بنحاول نطلع النسخة الأفضل اللى جوانا، رغم الجوع والعطش اللى بنعوضه بكرمنا على معدتنا بزيادة، يعنى نطبخ وناكل حاجات حلوة بزيادة ونشرب عصائر زيادة وبطننا توجعنا بزيادة، رغم الزيادات كلها بس منبعها فيه كرم، عشان كده خليك كريم زى رمضان طول السنة بأخلاقك، يعنى حب الخير لغيرك وافرح لفرح غيرك وساعد المحتاج واقف مع أخيك ومع صاحبك، خليك كريم مع اللى بيحبوك بأنك تحبهم أكثر، ادى اللى حواليك بسخاء، بس فكر فى نفسك أيضا، خليك كريم مع نفسك، اديها حقوقها بكرم، دلعها بكرم، ما تبخلش على نفسك بحاجة تفرحها ولا بفكرة تسعدها، أنت أول حد لازم تاخد بالك منه، أول حد لازم تبقى كريم معاه، بعدين كل اللى حواليك، خليك كريم مع أهلك، مع مراتك، مع أولادك مع أصحابك مع زمايلك فى الشغل والكرم مش عزومة أكل بمليون صنف، الكرم ضحكة صافية من القلب، إيد ممدودة عند الاحتياج، الكرم فى القلب قبل الجيب، خليك كريم طول السنة زى رمضان.

    رولا خرسا
    للأعلى