وجهة نظر

صفوا النية

2018-05-15 12:25:52 |
  • رولا خرسا
  • واحنا داخلين على شهر كريم، وكل أيّام ربنا كريمة لأن الكريم ميجيش منه إلا كل خير، بس طبعا رمضان فيه حبتين تلاتة عشرة خير أكتر..

    خير كده تحسه فى الجو وأنت صايم حتى لو جعان أو عطشان، يجى حد يلاقيك متنرفز يقول لك "صلى على النبى" فترجع عن عصبيتك وتقول "اللهم إنى صايم".. والصيام لا يجوز دون نية.. والنية أنك تقول نويت أصوم الشهر الكريم.. وفيه قول إن السحور بحد ذاته نية..

    المهم فى الموضوع النية.. والنية فى كل حاجة فى حياتنا.. عشان كده عايزة نستغل الشهر الكريم دا ونحاول نصفى النية.. مش للصيام والعبادات بس.. لا فى تعاملاتنا.. يعنى لو أنا زعلان من حد أحاول جوا قلبى مش مجرد كلام أنى أسامحه.. أو على الأقل أشيل من جوايا طاقة الغضب ناحيته.. تصفية النية تعنى البعد عن المصلحة.. أفرح لك من قلبى وأزعل معاك من قلبى.. يعنى مش أقعد أفكر فى "ليه اللى عندك مش عندى".. وأقول لنفسى "يا سيدى اللى ادالك حيدينى أكيد"..

    أصفى النية يعنى أتمنى لك الخير واللى يتمنى الخير لجاره حيلاقيه فى داره.. تعالوا نفكر حتى فى معنى الفعل.. "نصفي" يعنى كدة تجيب مصفى وتحط فيها كل المشاعر الوحشة، غيرة حسد غل غضب، وتغربل الوحش من الكويس.. فيفضل الكويس أو الخير اللى جواك.. والخير هو الأصل إحنا بس اللى بنخلى احتياجاتنا من الدنيا ومقارنتنا بأحوال غيرنا وتركيزنا مع نفسنا يحطوا على قلوبنا طبقات.. وطبقة فوق طبقة الحلو حيستخبى، ويبقى محتاج تقعد تنكش وتحفر كدة لغاية ما تطلعه..

    أما تصفى نيتك حتلاقى الدنيا أسهل.. المصفى حتسلك لك أمورك.. علاقاتك باللى حواليك حتتحسن جدا.. والخير اللى جواك حيعم.. صفوا نيتكم ناحية كل حد وأول حد هو نفسكم.. يعنى أكتر حد حيستفيد من النية الصافية أنتم.. وصدقونى كل واحد بياخد على قد نيته وعلى نياتكم تُرزقون.

    رولا خرسا
    للأعلى