وجهة نظر

الصاحب

2018-05-01 17:10:13 |
  • رولا خرسا
  • رولا خرسا

    فيه أغنية بحبها جدا اسمها يا صاحبى.."فى وقت الهم فضفض لى أشيل همك وتشيل همى"..تحس إنها تختصرالكثير من تعريف الصداقة فيها.

    ولو عرّفنا الصاحب حنقول إنه إللى تقدر تفتح له قلبك فى أى وقت..فى أَى وقت دى مهمة جدًا..يعنى مش لازم تقعد تفكر يا ترى دا وقت كويس ولا لأ.. ولا يوجد بينكما حاجز الرسميات الموجود فى العلاقات الأخرى.. هو من يضحى بوقته من أجلك ويكون معك فى فرحك وحزنك.. ودى نقطة مهمة قوي.. إنك تلاقى حد يفرح لك من قلبه.. دى نادرة جدًا جدًا.. يعنى التعاطف فى الحزن طبيعى وعامة الكل أمام الحزن يقف صامتًا.. أما الاختبار الحقيقى للمحبة فتكون فى الفرح.. إما تفرح من قلبك لخير جاء لصاحبك أو إما تشوفه فى حزن وتدعى له من قلبك بالفرح..عشان كدة قالوا "إذا صاحبت فى أيّام بؤس فلا تنسى المودة فى الرخاء والصاحب ساحِب".

    أمى كانت دائمًا تقول لى هذه العبارة.. الصاحب له تأثير كبير على صاحبه.. وأحيانًا أكثر من الأهل .. والصاحب الحقيقى هو من يعرفك من غير أَى مصلحة إلا صداقتك .. هناك مثل شعبى يقول "يا بخت مين بكانى وما بكٌاش الناس علىَ".. هذا المثل الحقيقة يستفزنى: هو ليه الصاحب لازم يبكى صاحبه؟ ما ينصحه بهدوء.. بكلام فيه تقدير لظروفه.. لضعفه.. وبدلا من لومه يحاول أن يعينه على اتخاذ القرار المناسب له لا الصح.. لأنه ما يمكن أن يكون صح لى ليس هو بالضرورة صح لك.. يجب تفهم الظروف وطبيعة شخصية الصاحب والحكم على أساسها.. صاحبك هو إللى تأمنه على سرك وأنت متأكد إن مهما حصل بينكم عمره ما يفضحك ..الصاحب الحقيقى عملة نادرة فى زماننا دا إللى المصلحة غلبت أى حاجة تانية .. الصاحب المخلص رزق ونعمة .. زى كل حاجة حلوة فى الدنيا .. الصاحب هو أول من تفكر فيه فى المصايب وفِى الأفراح، وإن اعتذرت عن تحميله حمولك يقول لك المشكلة بتهون إما يشيلوها اثنين.

    ربنا يكثر من أصحابنا الطيبين ..دول بقوا نادرين جدا ويديم علينا صحبة الطيبين .. دنيا وآخرة ..

    رولا خرسا
    للأعلى