وجهة نظر

اللى فاهم كل حاجة

2018-04-11 10:39:51 |
  • رولا خرسا
  • رولا خرسا

    فيه ناس فى حياتنا كده تحب طول الوقت تدى نصائح.. طول الوقت تحسسك إنها هى اللى فاهمة كل حاجة وإن معاها كاتالوج الحياة.

    فيه ناس كده تلاقيها وانت بتحكى أى مشكلة تبص لك كأنك من كوكب تانى.. العيون كده تتدور.. وتاخد نفس عميق وتحرك رأسها يمين وشمال فى حركة معناها مفيش فايدة فينا أو "يا حرام إيه الغلابة دول اللى عايشين مش عارفين يعملوا إيه أو يتصرفوا إزاى".

    وتبدأ المراحل المصاحبة للجلوس مع مثل هؤلاء الأشخاص بالتأنيب: "انت إزاى تعمل كده؟" "أو عقلك كان فين؟" ثم مرحلة تقطيم بأساليب مختلفة تتخللها شوية مصمصة شفايف ثم تأتى مرحلة النصيحة.. "المفروض كنت تعمل كده وكده وكده".. "وأنا لو مكانك شوف بقى كنت عملت إيه".. بس انت مش مكانه، ولا حد ينفع يكون مكان حد، وظروفك مش ظروفه، ولا عارف تفاصيله، ولا عقلك عقله، ولا طريقة تفكيره هى طريقة تفكيرك.

    وبعدين، مين قال إن فيه صح مطلق وغلط مطلق؟ كلها اجتهادات فردية.. يعنى كل حد فينا شايف الصح والغلط مش من وجهة نظره بل من وجهة نظر اللى حواليه.. فنحن تربينا على أنماط تفكير معينة وعلى أفكار وضعها المحيطون بِنَا فى أدمغتنا.. الحياة معقدة جدًا وفيها مليون وجهة نظر.. لماذا نحتكر وجهة نظر واحدة هى الخاصة بِنَا ونعتقد أنه يجب أن تكون الصحيحة؟ من قال إن خبراتنا فى الحياة هى المناسبة لخبرات غيرنا؟ ومن قال إن كل المتعارف عليه هو الصحيح؟ مع إن كله من صناعة البشر.. بشر من أمثالنا وضعوا أفكارًا تناسبهم ومن أتوا بعدهم اتبعوها أما لأنها تناسبهم أو لأنهم لم يفكروا فى تغييرها.

    الشخص اللى عارف كل حاجة دا بقى تلاقيه مقتنع بأفكار معينة ويحاولان يجعلك تطبقها.. لازم يدخٌل جمل من نوعية الناس حتقول إيه أو تصرفك دا غلط.. أولاً الناس مش بتسيب حد فى حاله.. ولا يعجبها حد.. ثانيًا غلط بالنسبة لمين وصح بالنسبة لمين؟

    مشكلة اللى عارف كل حاجة إنه بيتكلم بمنتهى الثقة.. الحقيقة أنا أحسد هؤلاء على ثقتهم.. من أين أتوا بها؟ بل ويدافعون بشراسة عن آرائهم وكأنهم فعلاً يمتلكون كل الحلول.. وتلافيهم محموقين جدًا كى يقنعوك وكأنهم فى سباق إن فازوا به حصلوا على جائزة.

    يا جماعة صدقونى كلنا مش فاهمين.. كتالوج الحياة شديد التعقيد.. وكلاما نقتنع إننا فاهمين بينزلوا بأوبشنات جديدة.. لو الواحد فينا بس حط المفتاح ودور العربية الدنيا حتبقى ميت فل وعشرة.. الخلاصة محدش فاهم حاجة خاصة اللى بيقولوا إنهم فاهمين كل حاجة.. سيبوها على الله دا احنا ماشيين ببركة دعا الوالدين.

    رولا خرسا
    للأعلى