وجهة نظر

الست الجدعة

2018-03-28 11:46:17 |
  • رولا خرسا
  • رولا خرسا

    الست الجدعة.. اللى بيتقال عليها بـ100 راجل، واللى تلاقيها فى وقت الزنقة تسد.. الست اللى بتضحك فى وشك حتى لو هى تعبانة.. اللى تصحى عيانة وتعبانة وبرضو تعمل اللى عليها..

    اللى تطبطب على الكل وتهتم بالكل وساعات كتير تنسى نفسها.. اللى تروح الشغل أيًا ما كان.. بياعة خضار على رصيف أو وزيرة..

    الست الجدعة هى اللى تعرف إن جوزها محتاجها فتقف جنبه وتسنده.. تبيع دهبها وتديهوله.. الست الجدعة هى اللى تقدر ظروف جوزها وما تحملوش فوق طاقته.. اللى تلاقيها كدة فى الأفلام بتدى اللى يقرب منه روسية فى دماغه تطيره..

    الست الجدعة هى اللى عمرها ما تفكر إنه ضَل راجل ولا ضَل حيطة.. بل بالعكس تقف لوحدها قدام الدنيا ولا إنها تعيش مكسورة.. اللى هى تضلل على الكل.

    الست الجدعة.. حنينة.. ممكن ماتبينش بالكلام بس تحس إنها سندك وظهرك.. ترد غيبتك وتعمل لك حساب فى وجودك وغيابك.. اللى مهما زعلت منك ما تطلعش تحكى مشاكلكم برة.. واللى لو قصرت معاها فى أى حاجة عمرها ما تعايرك ولو حياتكم ما استمريتش سوا عمرها ما تحكى أسرارك..

    الست الجدعة.. هى اللى تقول لأولادها كل حاجة حلوة عن أبوهم وما تقعدش تطلع فيه عيوب الدنيا مهما كانت فعلًا فيه.. الست الجدعة هى اللى ما تسيبش أمها وأبوها أما يكبروا.. اللى تقف جنب مرات ابنها لو معاها حق أو جوز بنتها.. الست الجدعة هة اللى رغم مآسى الدنيا ووجعها لسه عندها القدرة على الابتسامة.. لسه قادرة تضحك وتهزر حتى ولو وسط الدموع.

    الست الجدعة.. هى اللى أما تعرف إن صاحبتها فى شدة تقف معها.. مش اللى بتشارك فى الأفراح فقط.. الصاحبة اللى تلاقيها ساعة الولادة أو لو مزنوقة فى شغل أو خروجة.. هى الصاحبة اللى تحل لك مشاكلك مع اللى بتحبيه مش تسخنك عليه.. هى اللى تستقبلك فى بيتها.. تعيطى لها.. هى اللى أما تكون عندك كارثة زى حالة الوفاة تقف جنبك وتشد حيلك.. الجدعة هى أول حد تلاقيه وتفكرى فيه أما تكونى فى أزمة..

    ربنا يكتر من صاحباتنا الجدعان.. الصاحبة الجدعة رزق.

    رولا خرسا الست الجدعة
    للأعلى