وجهة نظر

الـ«سترونج إندبندنت وومان»

2018-03-21 12:20:25 |
  • رولا خرسا
  • رولا خرسا

    كنت طول عمرى مناصرة لحقوق المرأة.. أومال!.. أنا واحدة مؤمنة جدًا بالمساواة وضد التمييز، ووالله خدت جوائز على الموضوع ده.. منها جائزة من اليونيسيف على اهتمامى بموضوعات المرأة والطفل.

    بس النهاردة وأنا بشوف كمية الأعباء التى أصبحت تلقى على المرأة باسم المساواة لقيت نفسى بعيد نظر.. ستات كتير من أجيال سابقة حاربت عشان نقدر نخرج والنتيجة بقى يتقال لنا: عايزة مساواة؟.. عايزة تشتغلى؟.. خدى مساواة وشغل بس تعملى اللى عليكى.. يعنى شغل البيت على تمارين الأولاد على دروسهم.. كل هذا إضافة لعملك.

    طبعًا النساء تعودن على كل هذا ولَم تعد تجرؤ واحدة على الشكوى بل الطبيعى إنها تعمل زى ما سوزى وإنجى وداليا بيعملوا.. مين دول؟.. معرفش، بس أكيد فيه سوزى وإنجى وداليا مطحونين فى مكان ما، وتلاقى شيرين وإيمان مطحونين معاهم كمان فى مكان تانى.. ويلا كل واحدة تقرا المقال تحط اسمها عشان ما ننساش حد.. ومطلوب من الست طول النهار إنها تكون قوية ومستقلة "strong independent".

    يعنى مش معتمدة على حد خالص.. بينما الراجل معتمد عليها تمامًا.. كام أو كزوجة أو كسكرتيرة أو حتى عاملة منزل.. الواحد وهو بيتفرج على أفلام الأبيض والأسود والست هانم رايحة النادى وجاية من الكوافير أو من عند الترزى.. وقاعدة مع صديقاتها فى حفلات وسهرات بيتفرجوا على سامية جمال وتحية كاريوكا.. وَالدادة الجميلة بتاعة ليلى مراد بتعيش فى البيت كفرد من الأسرة والطباخ والسفرجى والسواق، كلهم أفراد من الأسرة، وداخلين فى تفاصيل حياة أصحاب البيت.. ونتفرج على مديحة يسرى وهى بتحارب عشان المرأة، وفاتن حمامة كمان وهن هوانم كدة لابسين حلو ورايقين ونستغرب أُمال إحنا ليه بقينا كدة مطحونين؟..

    ولو الست ست بيت مش بتشتغل يفضّل الراجل يقول لمراته إنتى بتعملى إيه ما انتى قاعدة طول النهار فاضية يعنى بتتعبى من إيه؟..

    بصوا بقى من الآخر حتة "إندبندنت سترونج" جاية علينا بخسارة.. طب فين الوومان فى الليلة دى؟.. الهانم اللى قاعدة تجرى فى مليون حتة طول النهار؟؟.. وبين البيت وبرة توصل آخر النهار هلكانة فطسانة.. تكونش فيه مؤامرة ذكوريّة كونية علينا كنساء أنا اللى ناديت طول عمرى بالمساواة تعبت.. حاسة إن مفيش مساواة.. عايزة فعلًا اتساوى بالراجل.. اشتغل واتفرج على ماتشات واقعد على القهوة.. وارجع البيت تعبانة مجهدة ألاقى أكلى جاهز وكباية الشاى بعدها.. ضحكوا علينا أما قالوا مساواة.. قال زى الراجل قال.

    رولا خرسا
    للأعلى