وجهة نظر

القوى

2018-02-27 20:17:38 |
  • رولا خرسا
  • تربينا ونحن نسمع "خليك قوى".. أثناء الولادة أو المرض يقولون للمرأة "شدى حيلك" و"خليكى قوية".. ولو بكى الرجل يقال له "ما تعيطش خليك مؤمن".

    هذه العبارات تستفزنى جدا، فمن قال إن البكاء يتعارض مع الإيمان؟ ومن قال إن التعبير عن الألم ضعف؟ ومن قال إن الإنسان يجب أن يكون قويا طوال الوقت؟ وما هو تعريف الناس للقوة؟ القوى هو المتماسك اللى ما يحتاجش حد واللى ما نشوفش دمعته؟ اعتقد إنها كلها تعريفات خربت حياتنا.

    ممكن تبقى قوى على فكرة وتعيط عادى وتصرخ وتتنرفز وكله، القوى هو اللى بيعمل كل دا ويكمل، اللى الدنيا تفضل تدى له فى كل أنواع المقالب والضربات ويقع ويرجع يقف ويكمل، القوى هو اللى الدنيا تقسى عليه أوى ورغم كده ما يقساش، اللى رغم خذلان البشر ليه بيفضل عنده استعداد يحب ويستقبل الحب، القوى هو اللى فى عز أزمته ما يفكرش فى نفسه بس إنما يفكر فى اللى حواليه.

    القوى هو اللى ياخد موقف يتفق مع ضميره وأخلاقه مش اللى يمشى مع الرايجة، القوى هو اللى أما تبقى فيه مشكلة يتماسك ويفكر حنحل إزاى المشكلة حتى لو بعد كده انهار.

    القوى هو اللى بيتقال عليه "ظهر"، تحس إنه سند تقدر تعتمد عليه تقدر تثق فى وعده وكلمته لأنه حينفذه ولو حطوا سيف على رقبته، الشخص القوى واثق من نفسه يعنى مش فارق معاه مين حيقول إيه طول ما هو متأكد إنه صح، القوى متواضع لأن الكِبر للضعيف بس لأنه بيحاول يثبت إنه قوى ومهم ومفيش زيه فى الدنيا، القوى هو اللى بيتحمل مسؤولية مش اللى يكون عنده أكتر من حل ويختار يهرب وما يواجهش.

    القوى هو اللى بيسامح لأن التسامح يحتاج إلى شجاعة وقوة، القوى هو الحر الذى لا يخضع لضغوط من هو حوله فى أمور هو غير مقتنع بها، المشكلة إننا تربينا على نظرية إن القوة قوة عضلات، فتجد الكثيرين يعجبون بتصرفات شخص غير قوى، عشان الجسم، اللى هو عبارة عن عضلات هركليز، يعنى بالبلدى كده ومن الآخر من بره هالّا هالّا ومن جوا يعلم الله.

    رولا خرسا
    للأعلى