وجهة نظر

شاطر

2018-02-20 20:37:01 |
  • رولا خرسا
  • بنقعد نقول للعيال إعمل كدة عشان تبقى شاطر، وأنا حتى لأصحابى اللى مش أطفال خالص بحب أستخدم معاهم لفظ شاطر للتشجيع ولو عزاز على قلبى ممكن أقول "شطور" أو "شطورة" وهى دلع أو تدليل شاطر.

    عادى يعنى هو الأطفال بس اللى محتاجين تشجيع ولا دلع؟؟ كل حد فينا محتاج حد فى حياته يقول له أنت شاطر ويقوله أنت عملت حاجة كويسة.

    كل حد فينا محتاج اللى يخليه يحس أنه أشطر واحد فى الدنيا حتى لو كان أخيب من الخيابة، بس عارفين معنى شاطر؟ ليها معانى كتير بعيدة عن اللى بنستخدمها فيه، تخيلوا معنى الشاطر إيه فى اللغة؟

    الفعل شاطر يعنى قاسم وعادة بنقول نشاطركم الأفراح يعنى نشارككم، بس المقصود بكلمة شاطر الذى شطر نحو الشر وأراده، الشاطر هو المكير الخبيث الداهية ودا مش بعيد عن مصطلحاتنا أما فى الصوفية فمعنى شاطر فهو السابق المسرع إلى الله اللهم اجعلنا دوما من المسرعين إليك.

    نرجع لشاطر فهى مثل كلمات كثيرة غلب المعنى المتداول على المعنى الأصلى، محدش فينا بيدور فى أصل الكلام ويستخدمه، ولكن العلم بالشىء لا يضر أبدا، يعنى نعرف أصل الكلمات كثقافة ولكن صعب أن نغير استخداماتنا لها.

    نقول تاجر شاطر عن اللى بيكسب كويس ونقول صنايعى شاطر عن الماهر بيديه، ونقول طالب شاطر عن المتفوق بين أترابه ونقول حرامى شاطر بمعنى الذكى الماكر، وست شاطرة بمعنى اللى بتعرف تمشى أحوالها مع زوجها.

    يعنى لو فكرنا حنلاقى فعلا أن الشطارة مرتبطة بالذكاء ولو أن زمان قالوا "قيراط حظ ولا فدان" شطارة يعنى مش كفاية تكون شاطر فى الدنيا عشان أحوالك تبقى فلة، الحظ مطلوب طبعا، وبعيدًا عن الحياة اللى مش دايما بتبقى زى ما إحنا عايزينها تكون خلينا مع اللى حوالينا.

    كل واحد فينا جواه صوت بيسأل "أنا شاطر ولا لأ؟"، عشان كدة ما تستخسرش فى اللى حواليك كلمة تشجيع وقل لهم على طول أنهم شطار.

    كل واحد فينا عايز يبقى شاطر فى عيون حبايبه ولكل من يقرأ المقال أقول له أنت شاطر حتى لو ما لقيتش حد يقولك يا شاطر، وشاطر شاطر شاطر بصوت نانسى عجرم.

    "عدوا آخر حتة دى القافية حكمت بس".

    رولا خرسا
    للأعلى