وجهة نظر

الشوارع حواديت

2018-01-25 09:24:07 |
  • مؤمن المحمدى
  • لو إنت فى محطة الزيتون وخدت شارع عوض فهمى من أوله هـ ينتهى بيك فى آخره لـ شارع رئيسى طويل عريض شحط محط اسمه شارع سليم الأول

    جميل!

    جميل

    اسأل فى شارع سليم الأول

    عن شارع سنان باشا

    وادخل سنان باشا من سليم الأول

    فى اتجاه جسر السويس

    هـ تلاقى أول شارع رئيسى فى طريقك

    شارع رئيسى طويل عريض شحط محط

    اسمه شارع طومان باى

    يعنى إحنا عندنا

    فى نفس الحى

    شارعين متوازيين

    واحد اسمه سليم الأول

    وواحد اسمه طومان باى

    يوصل بينهم شارع سنان باشا

    مين دول؟

    دول اللى بـ يثبتوا

    قد إيه القاهرة مدينة ظريفة

    وعسل

    والنبى عسل

    أصك حضرتك

    طومان باى دا

    أعدموه على باب زويلة

    مين اللى أعدمه؟

    دا سؤال برضه؟

    سليم الأول طبعا

    سليم دا سلطان عثمانى

    من ولاد عثمان بن أرتوجلور ابن التييييت

    اللى احتل القاهرة

    من 501 سنة وكام يوم

    بـ جيش جرار يقوده بـ نفسه

    ويساعده دراعه اليمين سنان باشا

    حاكم القاهرة وقتها

    كان طومان باى

    اللى دافع على قد ما قدر

    لـ حد ما اتـ

    اتغلب فى النهاية وكت

    بس جابوه

    وعلقوه على باب زويلة

    سليم الأول وطومان باى وسنان باشا

    كل واحد منهم ليه حكايات وحكايات وحكايات

    لو كانوا يعرفوا

    إن الأمر هـ ينتهى بيهم

    لـ تعليق أسماؤهم

    على شوارع متقاطعة فى حى واحد

    وأهالي الحى دا

    ما يعرفوش عنهم حاجة

    أكيد

    كانوا صرفوا نظر عن كل دا

    وكانوا عملوا حاجة مفيدة

    يتابعوا الدورى مثلا

    مثلا مثلا يعنى

    استراحة قصيرة

    بـ اعتبارنا شعب متدين بـ طبعه

    الإذاعة المصرية من ساعة إنشاءها

    بـ تبدأ برامجها بـ القرآن الكريم

    ما ينفعش يذيعوا حاجة قبل القرآن

    ساعتها مكنش فيه تسجيلات لـ المقرئين لسه

    المقرئ لازم ييجي يقرا لايف

    من الاستوديو

    أوقات كان بـ يحصل

    إن المقرئ يتأخر لـ سبب ما

    فـ كان المذيع يطلع يقول

    هنا القاهرة

    نفتتح برامجنا لهذا اليوم

    باستراحة قصيرة

    اقتراح

    عندى اقتراح

    لو الفرقتين قبل الماتش

    اتفقوا على نتيجة معينة

    يبلغوا اتحاد الكورة بيها

    بدال ما رايحين فين؟

    رايحين الماتش

    جايين منين؟

    جايين من الماتش

    ولاعيبة تقلع

    ولاعيبة تلبس

    وحكام تصفر

    وحكم خامس يوطي فـ كل كورة

    وحامل راية

    إيده توجعه

    ومديرين فنيين يقفوا

    وجهاز طبى يقعد يجرى كل شوية

    وناس تفتح الاستاد

    وناس تقفل الاستاد

    وناس تقف فى البرد

    والتلفزيون يطلع وحدة تصوير

    مخرج ومساعد مخرج

    ومدير تصوير

    ومصورين

    وعمال

    وسواقين

    والقنوات تطلع محللين

    ومذيع حاطط فـ ودنه إير بيس

    ومعدين

    ومخرج فى الاستوديو

    وفوق كل دا

    خبير تحكيم عالمى

    يرضيك

    خبير تحكيم عالمى

    ييجي من بيتهم

    علشان طنطا تتعادل مع دجلة صفر/ صفر

    سباخ التيبي

    عارف سباخ التيبي

    فى فيلم البيضة والحجر

    الأستاذ محمود السباع

    الممثل ذو الصوت المميز

    اللى المخرجين حصروه فـ أدوار الشر

    مع إنى شايف قدراته

    أكبر بـ كتير من إنتاجه

    السباع درس إخراج فى لندن

    وإذاعة وتلفزيون فى أمريكا

    يعنى سباخ راح لندن وأمريكا

    وإنت قاعد هنا تهرى فى المهرى

    وكان مدير المسرح الكوميدى

    سباخ كان مدير المسرح الكوميدى

    وإنت قالبها دراما كوين

    بس قبل دور سباخ

    السباع كان عامل كام مشهد فى فيلم الفتوة

    الناس دايما يفتكروه بيهم

    حاول تفتكرهم

    يالا

    المهم

    أنا كل ما أشوف السباع

    أفتكر عم سيد

    عم سيد دا كان عنده كشك فى شارع قصر النيل

    وكان نسخة من محمود السباع

    شكل وصوت وتلامة

    وكان لـ سبب ما بـ يكره الزباين ويحتقرهم

    ويا ويلك يا سواد ليلك

    لو اديته الفلوس بـ إيدك الشمال

    مكنش عنده مانع يشتمك

    أول مرة هـ تمسك فـ خناقه

    بعدين هـ تحب تنكشه

    وتشوف ردود فعله

    مكناش نعرف إن اسمه عم سيد

    إلا لما مات

    كنا أنا ومحمد خير مسميينه سباخ

    لما كنا نتأخر

    وكل الأكشاك تقفل

    نقول ما بدهاش

    مضطرين نروح لـ عم سباخ

    مرة

    ومش كان قصدى فعلا

    رحت أشترى منه سجاير

    وقلت له:

    مساء الخير يا عم سباخ

    الغريبة إنه ما زعلش

    وليلتها كان لطيف جدا

    بعدها بـ كام يوم

    لقينا واحد واقف مكانه

    شخص لطيف جدا ومهذب

    سألناه بـ فضول

    أومال فين الراجل اللى بـ يقف هنا؟

    قال بـ بساطة:

    عم سيد؟

    تعيش إنت

    وناولنى السجاير ومشيت

    الغريبة إنى مشيت زعلان

    ربنا يرحم الجميع

    الشك

    واحد يسألنى

    يا كابتن بكر

    إنت ليه أون لاين 24 ساعة؟

    هو إنت مش بـ تنام خالص؟

    أقول له أنام ازاى؟

    أنام ازاى وأنا الشك هيقتلني

    فيه سؤال مجنني

    سؤال عمره 25 سنة

    زمانه دلوقتي كبر وبلغ واتجوز

    وخلف شوية علامات استفهام صغنططة

    هو المرحوم مجدى

    كان يقصد

    ضحكة عيون حبيبيى

    ضحكت ليها اللياليى

    ولا

    ضحكت عيون حبيبى

    ضحكت ليها الليالى

    أصل دى تفرق عن دى

    ثم إيه علاقة دى ولا دى

    بـ "سافر قلبى لـ حبيبى "

    لا وايه

    سافر بعد انشغالى

    أيوه انشغالى ف إيه بقى؟

    وحبيبى فين؟

    وسافر له ازاى

    والليالى اللى كانت ف الأول دى راحت فين

    الشك

    الشك هـ يقتلنى

    زى الحكمة بـ الظبط

    مؤمن المحمدى
    للأعلى