وجهة نظر

منتخب ثالث

2017-12-04 10:29:14 |
  • مؤمن المحمدى
  • مؤمن المحمدى

    النسخة التانية من المونديال اتلعبت فى إيطاليا 1934، وزى ما دول أوروبا أيرت لما اتلعب فى أمريكا الجنوبية، دول أمريكا كمان أيرت لما اتلعب فى أوروبا، وأكتر من منتخب ما رضيش يشترك، معظم المنتخبات تقريبا، لكن البرازيل حبت تمسك العصاية من النص.

    الحقيقة إن العلاقات التاريخية بين البرازيل والفيفا أقوى بكتير من أى دولة تانية فى أمريكا الجنوبية، منها جه رئيس للفيفا لفترات طويلة، هو هافيلانج لو تفتكروه، وشوف الفرق الكبير بين تعامل الفيفا مع بيليه ومع مارادونا مثلا.

    البرازيل فى تانى مونديال ما حبتش تقاطع البطولة، لكن فى نفس ذات النفس ما حبتش تخرج عن الصف اللاتينى (نسبة لـ أمريكا اللاتينية) فقررت تشارك بمنتخبها الاحتياطى مش الأساسى، لكن زى ما بيقول المثل: كل وبحلق عينيك، أكلة واتحسبت عليك، ما فادهاش ده بحاجة، والمسجل هو نتيجتها فى البطولة، نقطة.

    البطولة دى كان أول مرة يتعمل تصفيات، كان الدول اللى اتقدمت 32 دولة، منها مصر زى ما إحنا عارفين كويس، فقال لك مش هينفع كل دول ييجى، كان تنظيم بطولة من العدد ده حاجة مستحيلة وقتها ولا يمكن تخيلها بأى حال.

    رغم وجود تصفيات، البرازيل تأهلت مباشرة، هم أصلا لقوا تلات دول من الأمريكتين بالعافية، مع إنه يا أخى سبحان الله، إيطاليا ذات نفسيتها اللى منظمة كاس العالم دخلت تصفيات، دى كانت المرة الوحيدة اللى تحصل فيها الحاجة العجيبة دى.

    راحت البرازيل روما، ومكنش فيه فى النسخة دى مجموعات، على بختنا المهبب (مصر يعنى)، اللى هو 16 منتخب، يلعبوا دور الـ 16 على طول، ماتش واحد والغالب مستمر، ثم دور الـ 8، ثم السيمى فاينال ثم النهائى، يعنى كل مباريات كاس العالم شاكب راكب 16 ماتش، تخيل حضرتك إنه دلوقتى الدور التمهيدى بس تلات أضعاف الرقم دا.

    صحيح، الطب بـ يتقدم

    ما علينا

    القرعة حطت البرازيل تصنيف أول، فيه حاجة تانية أكتر من كدا؟

    مع ذلك جت قرعتها مع أسبانيا، واتغلبت 3/1 فى أكتر مونديال عرة لعبته السامبا.

    جون واحد!

    جون واحد يا برازيل

    عيب والله.

    مؤمن المحمدى
    للأعلى