وجهة نظر

ضربة البداية

2017-11-27 17:38:30 |
  • مؤمن المحمدى
  • سنة 1930، تولى حُكم البرازيل الرئيس فارجاس، كان لقبه "أبو الفقرا"، معاه بدأت البرازيل عهد جديد.

    بـ الصدفة كانت الفيفا وقتها قدرت أخيرا تنظم "كأس العالم"، مش بس كدا، دى كمان اختارت الأروجواى لـ تنظيم البطولة. السبب المعلن اللى قالته الفيفا، هو إن الأروجواى بـ تحتفل بـ مئوية استقلاله.

    السبب دا واضح ما كلش مع حد، فـ بدأوا يقولوا، وكمان علشان الأروجواى تحتفل بـ ذهبية الأوليمبياد، برضه السبب ما كلش، وطبعا الفيفا ما قدرش يقول السبب الحقيقى، وهو إن حكومة الأورجواى وعدت إن كل مصاريف الانتقال والإقامة عليها. وربما كان فيه أسباب حقيقية أكتر.

    ما علينا، تنظيم البطولة فى قارة أمريكا الجنوبية، خلى البرازيل قادرة إنها تشترك فى أول بطولة، البطولة اللى كان طبيعى إنها تتلعب من غير تصفيات، أساسا الفيفا كانت بـ تدلل على الاشتراك فى البطولة، وعمالين يلفوا ع الدول يقنعوها تروح أوروجواى.

    9 دول من الأمريكتين وافقوا، وليه لأ؟ حاجة بـ بلاش كدا، وعظيمة، وهـ يبقوا شاركوا فى بطولة على مستوى العالم، ولا تعب ولا سفر عشرميت ساعة، تمام. بـ صعوبة الفيفا أقنعت 4 دول أوروبية بـ الاشتراك، وبقى عندنا 13 منتخب.

    نعمل إيه؟

    قال لك نقسمهم 4 مجموعات، أول كل مجموعة يصعد السيمى فاينال، بس 13 إزاى يعملوا 4 مجموعات، قال لك: ما تحبكهاش، كل مجموعة فيها 3، يفضل منتخب حطه فى أى مجموعة، وتبقى المجموعة دى أربع منتخبات.

    راحت البرازيل البطولة، وقتها كان فيه مشاكل بين فريق ريو دى جانيرو، وفريق ساو باولو، وحاولت البرازيل توفق منتخب من لاعبى الفريقين، وما نفعش، فـ شاركت بـ منتخب من لاعبى ريو دى جانيرو بس، يعنى تقدر تقول إن النادى العريق هو اللى شارك فى البطولة.

    لـ التوثيق بس، وعشان دا أول مونديال أحب أقول لك قايمة البرازيل كاملة: جويل، فيلوسو، أوسكارينو، إيطاليا، بريلهانتى، زى لويز، راميز، بامبلونا، بينيفينوتو، فاوستو، فورتيس، فيرناندو، هيرموجينيس، أراكين بريغينيو، بولى، بينيديكتو، تيوفيلو، دوكا، روسينيو، كارفاليو ليتى، مانويلزينيو، موديراتو.

    تحت قيادة المدير الفنى دى كارفاليو.

    بس

    وبدأ التاريخ

    مؤمن المحمدى
    للأعلى