وجهة نظر

منتخب عادى

2017-11-24 09:57:44 |
  • مؤمن المحمدى
  • خلاص، روسيا بقى منتخب عادى، حضوره يشبه غيابه. ما وصلش فرنسا 98، ما عرفش يتأهل، بلغاريا تصدرت المجموعة اللى جمعتهم، وهم طلعوا التانى، لعبوا ملحق مع إيطاليا، اتعادلوا فى موسكو، واتغلبوا فى نابولى، وخرجوا غير مأسوف عليهم.

    رجعت بعدها لـ مونديال 2002 في كوريا واليابان، بعد ما عدت يوغسلافيا وسلوفينيا وسويسرا ولوكسمبورج وجزر فارو.

    فى الشرق الأقصى، وقارة آسيا اللى أول مرة بـ تنظم المونديال، رجعت روسيا لـ أيام، مش أيام ما كانت قوية، لأ، أيام ما كانت بـ تصطدم بـ الدولة المنظمة، ووقعت في المجموعة مع اليابان ومعاهم بلجيكا وتونس.

    أول ماتش كان ضد التوانسة، وقدر الروس إنهم يستغلوا خضة لاعيبة تونس ويدوهم 2/ صفر بـ الراحة، واليابان اتعادلت مع بلجيكا 2/2، أحسن بداية عملتها روسيا من زمااااان، أحسن حاجة فى المجموعات، إنك تكسب، والطرفين التانيين يتعادلوا، كدا لو كسبت الماتش الجى تصعد مباشرة، ولو اتعادلت الماتشين الباقيين تصعد برضه.

    الماتش التاني، روسيا واجهت اليابان، الضيف الحديث على عالم كرة القدم، لكنه ضيف سريع وتقيل، وبـ يلعب على أرضه فـ كسب الروس 1/صفر، إنما تانى يوم بوزيان التونسى يدى الروس هدية كبيرة لما يسجل هدف التعادل لـ تونس فى بلجيكا، فـ تبقى اليابان 4، روسيا 3، بلجيكا 2، تونس 1 قبل الجولة الأخيرة.

    مفيش نظام أحسن توالت، اللي اتلغى من 98، لما المونديال بقى 32 منتخب، لكن يكفى منتخب روسيا التعادل مع بلجيكا، علشان يصعد من غير حسبة برمة، وطبعا لو كسب يبقى خير وبركة، إنما الهزيمة تحطه في حسبة برمة، وغالبا هـ تخرج إلا لو تونس ادته هدية تانية وكسبت اليابان، بـ شرط ما تكسبهاش كتير، حاجة هم كدا.

    لـ تاني مرة يلعب الروس مع البلجيك مباراة فاصلة على التأهل وتطلع مباراة مثيرة مليانة أهداف وعمالة تروح وتيجى، الحقيقة إن السبب التانى اللى بـ يخلينى أستنى المونديال، غير إنى أشوف البرازيل ومنتخبنا لو صعد، هو الماتشات اللى زى دى.

    الماتشات اللي بـ تبقى بين فريقين متوسطين مكافحين، بـ تبقى فيها كفاح وندية وإثارة، حاجة كدا زى الإنتاج الحربى ما يلاعب المقاولين مثلا.

    يا ترى الروس عملوا إيه؟

    كوريا واليابان مونديال روسيا التوانسة
    للأعلى