وجهة نظر

الحسد

2017-11-21 20:28:36 |
  • رولا خرسا
  • بيقول لك العين فلقت الحجر، دى حقيقة، أنا من أشد المؤمنين بقوة الحسد وعندى شيخ مستنير صديقى جدا.. قال لى الحسد أقوى من السحر.. طبعا الحسد مذكور فى القرآن وده أكبر دليل على وجوده، ولكن الأدلة اليومية تخلى اللى ما يصدقش يبصم بالعشرة.

    ابنى دايما يتريق ويقول لى هو الحسد فى البلاد الأوروبية مش موجود ليه؟ أرد وأقول له موجود طبعا بس بره مش بيسموه حسد بيسموه طاقة سلبية، وعشان أوضح الصورة الحسد معناه إنك تتمنى زوال النعمة من عند شخص وتأخدها إنت.. عكس "الغبطة" معناها إنك تتمنى النعمة دى لنفسك ولغيرك، والغبطة شعور إنسانى بحت، يعنى اللى ما خلفتش طبيعى جدا جواها أما تشوف أطفال غيرها يبقى نفسها هى كمان فى أطفال.

    أما الحسد فبيتلخص فى جملة هو ليه عندها وأنا معنديش؟ أو اشمعنى فلان أو فلانة اترقى وأنا لا؟ أو ليه فلانة خدوها موديل أو تمثل وأنا موهوبة عنها؟ أو ليه فلان اتجوز فلانة وأنا كنت قدّامه وأنا أحلى منها 100 مرة؟

    الحسد إنك تفضل باصص فى طبق غيرك وعايز تاكل اللى فيه، وده شعور شرير، اه شرير، تتمنى نعمة لنفسك حاجة وتبص لنعم غيرك وتعوزها كلها لك حاجة تانية خالص، حتى لو بتعملها وإنت مش حاسس، إنك تبص للظاهر بس تقول فلانة مشهورة وجميلة وأكيد معاها فلوس عايزة ايه تانى؟ مين قالك إن شهرتها أو جمالها أو فلوسها خلوها سعيدة؟ أو فلان دا فى مركز مرموق شوف فيلته وعربيته ناقصه ايه؟ مين قال لك جوا قلبه فيه ايه؟ مين قالك هو حاسس بايه؟ ليه مقاييسنا كلها مادية؟ ليه بنقارن بس بالمظهر؟ ما يمكن اللى عندها طفل يكون مطلع عينيها أو مغلبها او ربنا حيحطها فى تجربة صعبة معاه؟

    مين قال لك إن المشهور ده مش حيدفع تمن شهرته حرمانه من حاجات كتير نفسه فيها؟ والله يا جماعة كل واحد شايل فى قلبه أحمال وهموم، فى الأوقات العادية بتبقى كيلوغرامات وفِى أوقات الأزمات بتبقى أطنان، نبطل نبص البعض، والكارثة بقى أما تبقى الدنيا مقفلة فى وشك بس كاتم جوه قلبك وساكت وتلاقى واحد "اختاروا اللفظ المناسب" يجى ويحسدك.. هى ناقصاك يا عم.

    رولا خرسا
    للأعلى