وجهة نظر

نظام غريب

2017-11-17 15:13:33 |
  • مؤمن المحمدى
  • فى أسبانيا 1982، كان أعظم منتخب لعب لـ البرازيل فى تاريخه، دا مش كلامى، دا كلام الفيفا، حتى لو كان الفريق دا ما كسبش المونديال.

    السوفييت كانوا فى المجموعة السادسة مع البرازيل، ومعاهم اسكتلندا ونيوزلندا، البرازيل هـ تكسب التلات مباريات، دا مش ضد السوفييت على إطلاقه، دا كويس من جهة، ووحش من جهة، وحش لـ إنه فيه مقعد محسوم، بس كويس لـ إن منافستك كانت فعليا ضد منتخبين.

    أول ماتش لـ السوفييت كان ضد البرازيل، صحيح البرازيل كانت حاجة قوية جدا جدا، لكنها كانت بـ تلعب تقريبا من غير حارس مرمى، اللى هو شريف إكرامى أرحم، تصور!

    كل كورة كانت بـ تروح على مرمى البرازيل خطر، بس المشكلة كانت إنك صعب توصل، صعب تطلع الكورة من نص ملعبك.

    السوفييت خطفوا هدف فى أول المباراة، بعدها بقت المباراة بين تيم البرازيل وداساييف.

    داساييف كان حارس مرمى سبارتاك موسكو، لعب شوية فى أسبانيا، سيفيليا تحديدا بس كان كبر ساعتها، 1982 كان عزه، وعمرى ما كرهت حارس مرمى زى ما كرهته، كل دقيقة فرصة واتنين تقول مستحيل تتصد، ويصدها، كنت مهووس بـ منتخب البرازيل، لكنه كان أخطبوط.

    فييين فى آخر المباراة قدرت البرازيل تسجل جونين، واحد منهم بعد حيلة نميسة ثبتت داساييف، ورغم الهزيمة السوفييت فرحوا لـ إنهم اتغلبوا بـ فارق هدف واحد بس، اسكتلندا كسبت نيوزلندا 5/2، ونيوزلندا كانت حصالة المجموعة فعليا، هم كانوا جايين يتفرجوا على كاس العالم، مش يشاركوا فيه.

    فى الجولة التانية، البرازيل سكعت أسكتلندا 4/1، دا خلى السوفييت يدخلوا ماتش نيوزلندا محتاجين بس يكسبوا اتنين صفر، ساعتها يلعبوا مع أسكتلندا فى الجولة الأخيرة على التعادل، وقد كان، قدروا يفوزوا تلاتة صفر بـ أقل مجهود.

    آخر ماتش كان عنيف جدا، أسكتلندا لازم تكسب، والسوفييت يكفيهم التعادل، أسكتلندا اتقدمت، وخلص الشوط الأول بـ الهدف دا، الشوط التانى، الوقت بـ يمر، بس السوفييت قدروا يتعادلوا، ولسه باقى نص ساعة عصيبة، قبل النهاية بـ خمس دقايق شيفرنادزه أحرز لـ السوفيت الهدف التانى، كدا اسكتلندا لازم تجيب هدفين.

    الماتش ما خلصش، واسكتلندا اتعادلت بعد تلاتين ثانية، والفريقين لعبوا سبع دقايق جنان، لـ حد الحكم ما صفر بـ صعود السوفييت لـ دور الـ 12.

    أيون

    دور الـ 12

    يا ترى عملوا إيه؟

    مؤمن المحمدى
    للأعلى