وجهة نظر

يغمة إسبانيا 1982

2017-11-07 11:17:52 |
  • مؤمن المحمدى
  • 1978، كأس العالم فى الأرجنتين، السوفييت لأول مرة ما يتأهلوش فعلا، علشان تبقى سابع مرة مونديال من غير الروس، عدم التأهل كان طبيعى مش زى مونديال 74، لعبت فى مجموعة مع المجر، والهناجريين قدروا يخطفوا منهم بطاقة التأهل فى الملحق.

    1982، المونديال رقم 12، أول مونديال أشوفه رأى العين، وأتابع أخباره لايف، والبدايات دايمًا بتبقى الأحلى، ما علينا.

    كأس العالم كان فى إسبانيا، والفيفا قرر يعرضها شوية، ويزود عدد المنتخبات لأول مرة من ساعة ما قالوا يا مونديال، والزيادة كانت النص مرة واحدة، يعنى من 16 منتخب نطينا لـ24 منتخب.

    24 دا رقم رخم جدا، علشان هـ يتقسم إزاى؟ يعنى لو قلنا 6 مجموعات، وهـ ناخد الأول والتانى، يبقى 12، الـ12 يتأهل منهم 6، والـ6 يبقوا تلاتة، فمش راكبة، ولو قلنا أربع مجموعات، ه يبقى كل مجموعة 6 منتخبات، بايخة، ومملة، وفـ الآخر يبقى ما عملناش حاجة، ما هم أربعة برضه، ونطلع على دور الـ 8، فـ اهتدوا لـ طريقة عجيبة ما حصلتش غير سنتها.

    24 منتخب، يتقسموا 6 مجموعات، يتأهل الأول والتانى، يبقوا 12 منتخب، يتقسموا مجموعات من أول وجديد، يبقوا 4 مجموعات، كل مجموعة تلات منتخبات، ياخدوا الأول بس من كل مجموعة، يلعبوا بيهم سيمى فاينال.

    طبعًا كان نصيب أوروبا فى اليغمة دى 14 مقعد، سمح بـ إن كل مجموعة من مجموعات التصفيات يتأهل منها اتنين مش واحد، فـ دا إدى فرصة لـ الاتحاد السوفيتى إنه يصعد بـ سهولة، هو كمان ما قصرش فى التصفيات، واحتل قمة المجموعة والتانى كان شقيق السوفييت تشيكوسلوفاكيا، اللى هى كمان بعد كدا اتفكت، لـ التشيك وسلوفاكيا (على فكرة التفكيك دا صعب تصفيات أوروبا جامد بعدين).

    غير السوفييت والتشيكوسلوفاك، مكنش فيه حد عليه الطلا، ويلز، وأيسلندا (اللى مكنش لسه يسمع عنها فى طبق اليوم) والتراكوة قبل النهضة المؤقتة أواخر التسعينات أوائل الألفية.

    صعد السوفييت، ووقعوا فى المجموعة السادسة، اللى كان فيها كمان البرازيل، وأسكتلندا ونيوزلندا، القرعة دى كانت سهلة جدا، وصعبة جدا.

    ليه بقى؟

    ويا ترى عملوا إيه؟

    مؤمن المحمدى
    للأعلى