وجهة نظر

الناس الجميلة

2017-10-10 22:17:00 |
  • رولا خرسا
  • فيه ناس كدة فى حياتنا بيدونا أمل.. بيصنعوا الفرحة.. بيسعدونا.. تلاقيهم على طول بيلاقوا الكلمة الصح اللى يقولوها لنا.. كلنا بحاجة إلى كلمة طيبة.. كلنا نعانى من مخاوف داخلية ونشعر فى أحيان كثيرة أننا نفتقد الثقة بأنفسنا.

    يأتيك صانع الفرحة ليكرر لك مواطن الجمال فيك حتى تصدقه وتصبح أكثر سعادة، الناس دى تحس أنها بتظهر أما تكون زعلان لأى سبب أو فرحان أوى.

    تحسها فرحانة لك من قلبها من غير حسد ولا غل.. عمرها ما تقول اشمعنى؟؟ ولا تبص فى طبقك.. الناس دى عمرها ما تدور فيك على أى عيوب تطلع فيك القطط الفطسانة.. بالعكس تدور وسط الزجاج اللى مسكور فيك على حتة وتقنعك انها قطعة هندسية حلوة.

    الحلوين دول لو زعلان تطبطب عليك وتخفف عنك.. الحلوين دول مش لازم تكون صديق قريب أو حد بتشوفه كل يوم.. حتلاقيه بيظهر ويختفى.. ممكن يبقى عنده مشاكل الدنيا وما يتكسفش يحكيها ولا يعترف بنقاط ضعفه قدامك وفى نفس الوقت اللى تكون حياته مكركبة آخر كركبة ولا أى حملة تنظيف وترويق ممكن ترتبها.. تلاقيه عنده أمل أن ربنا حيحلها وتلاقى بيدى لك أمل ويساعدك كأنه طير يرقص وهو مذبوح من الألم.

    الناس الجميلة دى تحس أنها عايزاك كويس.. قلوبها النقية وروحها الطيبة بتخلى الدنيا أحلى.. إحنا محاطين ببشر كل واحد فيهم باصص لك عندك ايه وصورك اللى بتحطها تخليهم ينقوا ويقولوا "أهو فلان سعيد وبيخرج وبيتفسح".. ولو بصيتم ورا الابتسامة بتاعته حتلاقوا قلب مليان هموم وبيحاول يهرب ولو لساعات من وحدته وظروفه.. بلاش نبص للصور ونحكم.

    كل واحد فينا جواه مشاكل لو انت جربت تشيلها مش حتستحمل.. خليك من الناس الحلوة اللى بتبص للحلو وتقول سبحان الله وتفرح لفرح غيرها من قلبها.. بص للروح مش للشكل حتشوف جمال حقيقى وتذكر أنك عندما تنشر الجمال حولك فإنك تقوم بترميم روحك إنت.. اعملها عشان نفسك لأنك لو كنت جميل من جوا سترى الوجود كله جميلا.

    رولا خرسا
    للأعلى