وجهة نظر

روسيا فى روسيا

2017-10-08 17:38:07 |
  • مؤمن المحمدى
  • أول منتخب هـ يلعب فى كاس العالم هو منتخب روسيا بـ طبيعة الحال.

    دى اتعرف إنها هـ تلعب، لحظة ما اتعرف إنها هـ تنظم الحدث، تحديدا يوم 2 ديسمبر 2010.

    روسيا هى جمهورية روسيا الاتحادية، اللى كانت لـ حد سنة 1991 جزء من "الاتحاد السوفيتى"، قبل ما يتفكك، وتبقى كل دولة لـ وحدها. ولـ إن روسيا هى أميز دول الاتحاد المرحوم، فيه ناس كتير بـ تعتبر روسيا هى الوريث الوحيد لـ السوفييت، وبـ التالى ورثت نتايجه وتاريخه.

    الكلام دا مش دقيق.

    أنا ما أعرفش الفيفا بـ يحسبها ازاى، بس الحكاية دى محيرة جدا، يعنى مثلا مثلا، مصر فى الفترة من 1958– 1961 كانت عاملة اتحاد مع سوريا، وكان اسمنا مع بعض "الجمهورية العربية المتحدة"، فـ هل يعتبر جزء من تاريخ سوريا فى كرة القدم، إنها كسبت بطولة كاس الأمم الإفريقية 1959.

    الكلام دا مش واقعى، وفضلا عن إنى ما سمعتش عن سوريين بـ يكتبوا أو بـ يقولوا حاجة زى كدا، فعليا، المنتخب المصرى كان كله من "المصريين"، مكنش فيه حد سورى، فـ الاتحاد بين مصر وسوريا كان اتحاد نظرى، ما خلاناش على أرض الواقع دولة واحدة.

    إنما رسميا الكلام دا صحيح جدا، سوريا حائزة على بطولة كاس الأمم الأفريقية 1959، بـ اعتبارها جزء من الجمهورية العربية المتحدة، اللى البطولة مسجلة بـ اسمها.

    اندماج الدول وتفكيكها، والاعتراف بيها، وعدم الاعتراف، والاستقلال والانفصال حصل كتير فى تاريخ الكورة، وحصل فى تاريخ كاس العالم نفسها، يعنى هـ نشوف ألمانيا لما ييجى دورها، لعبت مرة بـ منتخب بـ يضم ألمانيا كلها مع النمسا لما كانت النمسا جزء من دولة ألمانيا، ومرات ألمانيا نفسها بقت دولتين: ألمانيا الغربية وألمانيا الشرقية، ولعبوا سوا فى مونديال واحد، دا غير النمسا طبعا.

    طيب

    يرجع مرجوعنا لـ موضوعنا

    هـ نعمل إيه وإحنا بـ نستعرض تاريخ روسيا فى المونديال؟

    ولا حاجة

    هـ نرصد الأول الاتحاد السوفيتى لـ حد ما اتفكك، وروسيا هـ تبقى جزء من التاريخ دا، وأى جمهورية سوفيتية تانى هـ

    نعمل معاها كدا

    يالا بينا

    مؤمن المحمدى
    للأعلى