وجهة نظر

الشكاك

2017-09-19 09:56:12 |
  • رولا خرسا
  • بيقولوا فى الأمثال إن "الشك من حسن الفطن".. معناها إنك فى تعاملاتك مع البشر ما تثقش مية مية.. ولازم تحط دايمًا احتمال عكسى.. يعنى تحط احتمال إن حد هيخدعك أو هيغشك أو هيسرقك.

    فيه أبراج معروف عنها إنها شكاكة أكتر من أبراج تانية على رأسها العقرب وبعدها الجدى والعذراء.. أنا من النوع اللى من المستحيل أن أتعامل مع أى حد أشك فيه، على طول أسقطه من حساباتى وأطلعه من دماغى، وفرق كبير بين إنك تشك فى أى حد وبين إن تحصل حاجات تخليك تشك.. يعنى تلاقى الشكاك مثلاً ياخد كلامك يحلله وممكن يقول لك إنت كان قصدك حاجة غير إللى إنت أصلا فكرت فيها.. وأى حركة من أى حد بيضرب فى دماغه جرس يخليه يبتدى يعمل سيناريوهات ويقتنع بها.

    طبعًا الشكاك يعيش فى حالة من حالات الصراع الداخلى المستمر، مليون يا ترى ويا ترى فى كل موقف، ويتعايش الشكاك مع الشك إلا طبعا عندما يتحول إلى شك مرضى.. وتجد نفسك معهم فى أى حوار يشككوك فى كل حد حتى فى صوابع إيديك.. تجدهم يعيشون فى إجراءات حماية مستمرة.

    الشكاك هو شخص يتوقع الغدر أو الخيانة أو السرقة من كل حد، تجده حتى مع أقرب الناس له زوجته أو أولاده يفكر فى داخله هم بيضحكوا على ولا بيقولوا لى الحقيقة؟ أختى من النوع الذى لا يثق بسهولة، وترى أنى (.....) لأنى لا أفترض أى سوء نية حتى يحدث العكس.. والحق تعرضنا مؤخرًا لعملية نصب من سيدة كنا نثق بها.. أنا كنت أقول لأختى: "لا مش معقول دا احنا كنا كويسين أوى معاها مش ممكن تنصب علينا".. وأختى طبعا كانت تدعو أن أكون على حق.. ولكن طلعت الست نصابة ونص.. وطلع شك أختى فى محله.

    الدرس المستفاد.. مهما شكّيت واحتطت ممكن تقع برضو.. حتى الشكاك الحويط فيه إللى انصح منه أو بمعنى أدق الشرير المستغل.. هنا شك الشكاك لم يحمه.. ورغم هذا ستجده يزداد شكا.. فاللى اتلسع من الشوربة هينفخ حتى فى الآيس كريم.

    رولا خرسا
    للأعلى