وجهة نظر

يا بيبى

2017-08-29 20:40:39 |
  • رولا خرسا
  • واحدة صاحبتى كتبت من كام يوم ستاتيوس على الفيسبوك وقعنى من الضحك، "إن الدنيا مش هيتعدل حالها طول ما الستات بتنادى الرجالة بـ يابيبى"، والرجالة بتقول للستات "إنتى ست بميت راجل..".

    وتعالوا نفند مع بعض اللى بيحصل فعلا.. تلاقى رجل طول بعرض وبتقول له صاحبته، لأن الزوجات المصريات للأسف بيعتبروا الدلع ده مش للأزواج إنما للأولاد بس، أما الرجل فلا تقول الصاحبة أو الخطيبة أو الحبيبة، أى حد غير المتجوزة للطرف الآخر "يا بيبى"، وبعد الجواز يتحول إلى ".......".

    املوا انتو الفراغات، شوفوا كل واحدة بتقول إيه لجوزها (خاصة فى وقت الغضب).. ويخرج الرجل مع واحدة تفضل تدلّع فيه، فيصدّق يا عين أمه إنه بيبى فعلًا، ويبدأ يعتمد عليها فى تفاصيل حياته كلها، ما هو بيبى بقى عايز اللى يعمل له كل حاجة.. وعلى فكرة، أنا مش ضد الدلع، بالعكس، أنا أكتر واحدة بقول لازم نقول للى بنحبهم إننا بنحبهم.. مالها كلمة حبيبى؟ مالها كلمة زوجى أو مراتى؟

    بعتبر الرجل أما يقول لمراته يا مراتى إن ده منتهى الحب لها، ومنتهى الخصوصية، صفة خاصة جدًا.. أنا كل أما أسمع رجل بيقول مراتى بحس إنه بيقول لى دى بتاعتى وحبيبتى، وعندما لا يكون هناك حب تصبح الكلمة ثقيلة عند نطقها، فيكتفى بذكر اسمها كى لا يذكر نفسه بأنها مراته.

    ومن ناحية تانية تلاقى المجتمع كله بيربى البنت انها لازم تبقى رجل، وأما تكبر وتبقى ست تبقى بميت رجل.. فيتراجع شوية شوية إحساس الست نفسها بأنها ست، وتتعود تبقى أب وابن وأخ وصديق وسمكرى وسواق وكهربائى.. الفساتين تم استبدالها بالجينز وتحاول الست إنها تفكر نفسها إنها "ست" أما تحط كحل وروج.. بس اللى حاصل ده ضد قانون الكون.. إحنا فى الأصل إنسان أو بشر، وأنا من أشد المقتنعين بالنظرية اللى بتقول إن جوه كل رجل فيه جانب أنثوى وجوه كل ست جانب ذكورى، بيطلع ساعات كتير بس مش لازم يطغى.

    يعنى أحلى ما فى الست أنوثتها، وإنها هانم حتى لو بياعة فجل، وأحلى ما فى الرجل إنه "دكر"، وده بحكم تكوينه الجسمانى.. مفيش مشكلة أتصرف بجانبى الآخر أحيانًا، ولكن لا يجب أن يطغى جانب على الآخر فى المجتمع، أما فى العلاقة مع الحبيب أو الزوج فهمًا أحرار معًا، وبينهما يتبادلان الأدوار كيفما شاءا..يعنى الست تكون ميت رجل برة البيت، بس ميت ست أو رجل جوه وهو بيبى معاها، لو عاجبها إنما برة بلاش دلع ماسخ، خاصة أمام الستات التانية، خليك ميت رجل ببعض وصدقنى حتعجب الستات أكتر..

    أما بالنسبة لى، فأنا اتعودت أسمع جملة إنتى ست بميت راجل بتتقال لى كتير، لدرجة إنى بفتكر فى أوقات كتير إنى فعلا رجل..وبالنسبة لبيبى بالنسبة لى فهى مش مرتبطة بأشخاص بل بمواقف.. إن فيه حاجات فى الدنيا كده بقول هاجى على نفسى وأجرب أعملها.. وبعدين مقدرش.. بحس إنى أحمد حلمى أما قال لكريمة السكرتيرة:

    "قولى يا بيبى... لا برضو مش قادر مش قادر...".

    رولا خرسا
    للأعلى