وجهة نظر

الندل

2017-08-08 20:53:33 |
  • رولا خرسا
  • "عيش ندل تموت مستور".. أعجب مثل ممكن تسمعه .. يعنى لو مكنتش ندل حتتفضح!! أو حتفتقر!! على اعتبار أن السترة فى العامية عدم فقر.

    عكس كل القيم والأخلاق، لمن يردد هذه العبارة أقول: "عايز تعيش ندل؟" حاقولك تعمل إيه بالضبط.. هذا المقال روشتة ندالة.. أقولك أنواع وأساليب الندالة؟

    ندل يعنى لو صاحبك فى ضيقة سيبه.. يعني لو حد لجأ لك اتخلى عنه.. الرجل النذل، هو من يخون الأمانة، يعنى لو حد أمِّنك على بيته، أو فلوسه اسرقها عادى وحطها فى جيبك، ولو أمنك على عائلته ما تسألش فيهم.

    الرجل النذل هو الذى يتنكر للجميل، وبسهولة مطلقة، يعنى تعمل له خير كتير يعتبر دا عادى، وفرض عليك، وأما ييجى وقت يرد لك الجميل يخلع.. ندل ندل يعنى.. وعايز تبقى ندل أكتر؟ زيد على الندالة شر.. وكافئ الخير بالشر.

    الندل فى علاقة الرجل بالمرأة هو من يلعب بمشاعرها، ويستخف بحبها له، من يجعلها تعانى، و يتركها من دون أى سبب حقيقى، يخترع لها حجج غير حقيقية أو حتى حقيقية، عايز تبقى ندل مع ست؟ اوعدها بالجواز واخلع ... عايز تبقى ندل مع مراتك؟؟ أول ما تغلط اوعى تروح تكلمها وتديها فرصة للتفاهم.. طلقها فورًا انت لسة حتتفاهم، وتسامح وتحاول تفهم هى غلطت ليه؟

    عايز تبقى ندل مع أهلك؟ سيبهم فى عز احتياجهم ليك وعش حياتك.. ونيِّم ضميرك وقول "ما دا دورهم إنهم يربونى أمال جابونى ليه؟".. عايز تبقى ندل مع صاحبك اللى عنده مشكلة سياسية؟ قول أنا مالى يا أخويا أنا ماشى جنب الحيط.. عاوز تبقى ندل مع حد بيشتغل معاك؟ مشيه أما تعرف إنه محتاج شغل.. وقل لنفسك: "وأنا مالى بيه هو أنا خلفته ونسيته؟"

    معنى فعل ندَل فى المعجم أى "اختلس" أو سرق .. بالنسبة لى "الندل" هو من "باعك".. بص حواليك وعِد.. كم عدد الأندال الذين مروا بحياتك؟ بالنسبة لى فأنا بطلت أعد من زمان... حنقول إيه بس؟ الندل فيه اللى أندل منه.. والدنيا دوَّارة.. لسَّه عايز تعيش ندل؟؟

    رولا خرسا
    للأعلى